കരുനാഗപ്പള്ളി കൊലക്കേസ് സിനിമയെ പോലും വെല്ലുന്ന ചേസിംഗ്…

കൊല്ലം കരുനാഗപ്പള്ളിയെ നടുക്കിയ ഗുണ്ടാ നേതാവ് ‘അലുവ അതുൽ’ വധക്കേസിലെ മുഖ്യപ്രതികളടക്കം നാലംഗ സംഘം ഒടുവിൽ പോലീസിന്റെ പിടിയിലായി. കോട്ടയം മുണ്ടക്കയം ഭാഗത്താണ് പ്രതികളെ പിടികൂടിയത്. കരുനാഗപ്പള്ളി മുതൽ മുണ്ടക്കയം വരെ പോലീസിന്റെ കണ്ണുവെട്ടിച്ച് എത്തിയ സംഘത്തെ അതിസാഹസികമായ നീക്കങ്ങളിലൂടെയാണ് സ്പെഷ്യൽ ബ്രാഞ്ച് ഓഫീസർ ജോൺസൺ AJ കുടുക്കിയത്.

സിനിമയെ വെല്ലുന്ന ചേസിംഗ്

ശനിയാഴ്ച പുലർച്ചെ കൊലപാതകം നടത്തി ഒളിവിൽ പോയ പ്രതികൾ സഞ്ചരിച്ച വാഹനം മുണ്ടക്കയം കോസ്‌വേ ജംഗ്ഷനിൽ നടന്ന പോലീസ് പരിശോധനയ്ക്കിടെയാണ് ശ്രദ്ധയിൽപ്പെട്ടത്. പോലീസിനെ കണ്ടതോടെ വാഹനം വെട്ടിച്ചു കടന്ന സംഘം രക്ഷപ്പെടാൻ ശ്രമിച്ചു.

ഇതോടെ സ്പെഷ്യൽ ബ്രാഞ്ച് ഓഫീസർ ജോൺസൺ AJ പ്രതികളെ തിരിച്ചറിഞ്ഞു. സ്വന്തം ജീവൻ പോലും പണയപ്പെടുത്തി സമീപത്തുണ്ടായിരുന്ന ഒരു പിക്ക് അപ്പ് ലോറിയിൽ കയറി പ്രതികളുടെ വാഹനം പിന്തുടരുകയായിരുന്നു.

പ്രതികളെ തടയാൻ ലോറി ഉപയോഗിച്ച് വാഹനത്തിൽ ഇടിച്ചു നിർത്താൻ ശ്രമിച്ചതോടെ സംഘം ഭീതിയിൽ അമിതവേഗത്തിൽ രക്ഷപ്പെടാൻ ശ്രമിച്ചു. എന്നാൽ മുണ്ടക്കയം പുത്തൻചന്ത** ഭാഗത്ത് വെച്ച് മറ്റൊരു സ്വിഫ്റ്റ് കാറിൽ ഇടിച്ച് അപകടം സംഭവിച്ചു.

കാടുകയറി രക്ഷപ്പെടാൻ ശ്രമം

അപകടത്തിന് പിന്നാലെ മുരിക്കുംവയൽ ഭാഗത്ത് കാർ ഉപേക്ഷിച്ച് പ്രതികൾ സമീപത്തെ റബ്ബർ തോട്ടങ്ങളിലേക്കും കാടുകളിലേക്കും ഓടി രക്ഷപ്പെടാൻ ശ്രമിച്ചു.

ഇതിനിടെ ജോൺസൺ AJ ഉടൻ തന്നെ വിവരം പോലീസിനെ അറിയിച്ചതോടെ എരുമേലി, പൊൻകുന്നം, കാഞ്ഞിരപ്പള്ളി സ്റ്റേഷനുകളിൽ നിന്നുള്ള വലിയ പോലീസ് സംഘം സ്ഥലത്തെത്തി. പോലീസും നാട്ടുകാരും ചേർന്ന് പ്രദേശം മുഴുവൻ വളഞ്ഞതോടെ ഒടുവിൽ രക്ഷപെടാൻ വഴിയില്ലാതെ പ്രതികൾ കീഴടങ്ങുകയായിരുന്നു.

കൊലപാതകത്തിന് പിന്നിൽ ഗുണ്ടാപ്പക

കഴിഞ്ഞ വർഷം കൊല്ലപ്പെട്ട ‘ജിം സന്തോഷ്’വധക്കേസിലെ ഒന്നാം പ്രതിയായിരുന്നു കൊല്ലപ്പെട്ട അലുവ അതുൽ (30). ആ കൊലപാതകത്തിനുള്ള പ്രതികാരമാണ് ഇപ്പോൾ നടന്ന ആക്രമണമെന്ന് പോലീസ് വ്യക്തമാക്കി.

ജാമ്യത്തിലിറങ്ങിയ അതുൽ കരുനാഗപ്പള്ളി പോലീസ് സ്റ്റേഷനിൽ ഒപ്പിട്ട് മടങ്ങുന്നതിനിടെയാണ് ആക്രമിക്കപ്പെട്ടത്.
ഹരിയാന രജിസ്ട്രേഷനുള്ള ഇന്നോവ കാറിലെത്തിയ സംഘം, അതുൽ സഞ്ചരിച്ചിരുന്ന വാഹനം ഇടിച്ച് താഴ്ച്ചയിലേക്ക് മറിച്ചിട്ടു. തുടർന്ന് ഗ്ലാസ് തകർത്ത് പുറത്തെടുത്ത് വെട്ടിക്കൊല്ലുകയായിരുന്നു.

ജിം സന്തോഷിനെ അദ്ദേഹത്തിന്റെ അമ്മയുടെ മുന്നിൽ വെച്ച് സ്ഫോടക വസ്തു എറിഞ്ഞ ശേഷം വെട്ടിക്കൊന്ന കേസിലെ പ്രധാനിയായിരുന്നു അതുൽ. ഇതിന്റെ പ്രതികാരം ചെയ്യാൻ സന്തോഷിന്റെ സംഘം മുൻകൂട്ടി പദ്ധതിയിട്ടിരുന്നതായും പോലീസ് വ്യക്തമാക്കി.

സ്പെഷ്യൽ ബ്രാഞ്ച് ഓഫീസർ ജോൺസൺ AJയുടെ ധൈര്യവും സമയോചിതമായ ഇടപെടലുമാണ് വലിയ ഒളിച്ചോട്ടത്തിന് വിരാമമിട്ടത്.