തിരുവനന്തപുരം:വെട്ടുറോഡിൽ ടിപ്പറിനടിയിൽപ്പെട്ട് യുവതിക്ക് ദാരുണാന്ത്യം. പെരുമാതുറ
സ്വദേശിനി റുക്സാന (35)യാണ് മരിച്ചത്. മൂന്നര മണിയോടെയാണ് സംഭവം. കഴക്കൂട്ടം
ഭാഗത്തുനിന്നും കണിയാപുരത്തേയ്ക്ക് ബന്ധുവിനോടൊപ്പം സ്കൂട്ടറിൽ പോയ
യുവതിയാണ് മരിച്ചത്.
ഓവർടേക്ക് ചെയ്തുവന്ന ടിപ്പർ ഇടത്തേയ്ക്ക് ഒതുക്കിയപ്പോൾ ലോറിയിൽ തട്ടിയ
റുക്സാന ടയറിനടിയിലേക്ക് വീഴുകയായിരുന്നു. സമീപത്ത് ബസ് കാത്തുനിന്നവരുടെ
നിലവിളി കേട്ടാണ് ഡ്രൈവർ വണ്ടി നിർത്തിയത്. തുടർന്ന് ലോറി പിന്നോട്ടെടുത്താണ്
യുവതിയെ മാറ്റിയത്. ചതഞ്ഞരഞ്ഞ യുവതിയെ നാട്ടുകാർ ഉടൻ മെഡിക്കൽ
കോളേജിലെത്തിച്ചെങ്കിലും മരിച്ചിരുന്നു. സ്കൂട്ടർ ഓടിച്ച യുവതിക്ക് പരിക്കില്ല. ലോറി
ഡ്രൈവർ നഗരൂർ സ്വദേശി ജോയിയെ പൊലീസ് കസ്റ്റഡിയിലെടുത്തു. മംഗലപുരം
പൊലീസ് സ്ഥലത്തെത്തി മേൽ നടപടികൾ സ്വീകരിച്ചു.