രാത്രി കുട്ടി കരഞ്ഞതിന് കൊടും മര്‍ദ്ദനം, നാലു മാസം പ്രായമുള്ള കുഞ്ഞിന്റെ മരണം കൊലപാതകമാണെന്ന് തെളിഞ്ഞു,മാതാപിതാക്കള്‍ അറസ്റ്റില്‍
കോഴിക്കോട്. കൊടുംക്രൂരതയുടെ കഥ ഒന്നു കൂടി, പെരുവയലില്‍ നാലു മാസം പ്രായമുള്ള കുഞ്ഞിന്റെ മരണം കൊലപാതകമാണെന്ന് തെളിഞ്ഞു. മദ്യലഹരിയില്‍ അച്ഛന്‍ കുഞ്ഞിനെ മര്‍ദ്ദിച്ചു കൊലപ്പെടുത്തിയതാണെന്നാണ് കണ്ടെത്തിയത്. സംഭവത്തില്‍ കുട്ടിയുടെ അച്ഛന്‍ കുറ്റിക്കാട്ടൂര്‍ സ്വദേശി ഷിജിന്‍, അമ്മ അഞ്ജന എന്നിവര്‍ അറസ്റ്റിലായി.
2025 ഒക്ടോബര്‍ ഒന്നിനാണ് കൊലപാതകം നടന്നത്. കുട്ടി രാത്രി വിളിച്ചിട്ട് എഴുന്നേല്‍ക്കുന്നില്ലെന്നും, മൂക്കിലൂടെ കഫം വരുന്നു എന്നു പറഞ്ഞ് സമീപത്തെ ആശുപത്രിയില്‍ എത്തിച്ചു. ഗുരുതരാവസ്ഥയിലായതിനെത്തുടര്‍ന്ന് കോഴിക്കോട് മെഡിക്കല്‍ കോളജിലേക്ക് മാറ്റി.
മെഡിക്കല്‍ കോളജില്‍ ചികിത്സയിലിരിക്കെയാണ് മരണം സംഭവിച്ചത്. മെഡിക്കല്‍ കോളജില്‍ നടത്തിയ പോസ്റ്റ് മോര്‍ട്ടം റിപ്പോര്‍ട്ടിലാണ് സ്വാഭാവിക മരണമെല്ലെന്നും, മര്‍ദ്ദനമേറ്റിട്ടുണ്ടെന്നും സൂചിപ്പിച്ചിരുന്നത്. എന്നാല്‍ മര്‍ദ്ദനമേറ്റ കാര്യം കുട്ടിയുടെ അമ്മ അഞ്ജന ആരോടും വെളിപ്പെടുത്തിയിരുന്നില്ല. എന്നാല്‍ നാട്ടുകാര്‍ ചില സംശയങ്ങള്‍ പൊലീസിനോട് സൂചിപ്പിച്ചിരുന്നു.
ഇതിന്റെ അടിസ്ഥാനത്തില്‍ അഞ്ജനയെ പൊലീസ് വിശദമായി ചോദ്യം ചെയ്തപ്പോഴാണ് കൊലപാതകം സ്ഥിരീകരിച്ചത്. സ്ഥിരം മദ്യപാനിയായ ഷിജിന്‍, രാത്രി കുട്ടി ഉറക്കെ കരഞ്ഞതിന്റെ ദേഷ്യത്തിലാണ് മര്‍ദ്ദിച്ചതെന്നാണ് അഞ്ജന പൊലീസിനോട് പറഞ്ഞത്. കൊലപാതകക്കുറ്റത്തിന് ഷിജിനെയും, വിവരം മറച്ചുവെച്ചതിന് അഞ്ജനയെയും അറസ്റ്റ് ചെയ്യുകയായിരുന്നു.