ഷിരൂരിൽ പുരുഷ മൃതദേഹം കണ്ടെത്തി; ശരീരം ജീർണിച്ച നിലയിൽ
ഷിരൂരിൽ അകനാശിനി ബഡെ കടൽത്തീരത്ത് പുരുഷ മൃതദേഹം കണ്ടെത്തി. ഇന്ന് ഉച്ചയോടെ മത്സ്യത്തൊഴിലാളികളാണ് ജീർണിച്ച നിലയിൽ മൃതദേഹം കണ്ടെത്തിയത്. സ്ഥലത്തേയ്ക്ക് പോലീസ് സംഘം തിരിച്ചിട്ടുണ്ട്. ഷിരൂരിലെ മണ്ണിടിച്ചിലിൽ കാണാതായവരുടെ മൃതദേഹമെന്നാണ് പ്രാഥമീക നിഗമനം.
ഷിരൂരിൽ നിന്നും 60 കിലോമീറ്റർ ചുറ്റളവിലാണ് മൃതദേഹം കണ്ടെത്തിയത്. ഈ പ്രദേശത്ത് നിന്ന് ഒരു മത്സ്യത്തൊഴിലാളിയെ കാണാനില്ലെന്ന് നേരത്തെ വിവരമുണ്ടായിരുന്നു. ഡിഎൻഎ പരിശോധനയ്ക്കൊരുങ്ങുകയാണ് ജില്ലാ ഭരണകൂടം. കടൽതീരത്തോട് ചേർന്നാണ് മൃതദേഹം കണ്ടെത്തിയത്.
കര്‍ണാടകയിലെ ഷിരൂര്‍ ദേശീയ പാതയിലുണ്ടായ മണ്ണിടിച്ചിലില്‍ കാണാതായ അർജുനെ കണ്ടെത്താൻ ശ്രമിക്കണമെന്ന് കർണാടകയോട് മുഖ്യമന്ത്രി പിണറായി വിജയൻ കഴിഞ്ഞ ദിവസം ആവശ്യപ്പെട്ടിരുന്നു. ആവശ്യമുന്നയിച്ച് കർണാടക മുഖ്യമന്ത്രി സിദ്ധരാമയ്യക്ക് പിണറായി കത്തയച്ചു. നിലവിൽ തെരച്ചിൽ നിർത്തിവെച്ചിരിക്കുകയാണ്. ഈ സാഹചര്യത്തിലാണ് മുഖ്യമന്ത്രി കത്തയച്ചത്.
