”സര്‍ എന്റെ ഫോണ്‍ പരിശോധിച്ചാല്‍ എന്നെ ഊരിയെടുക്കാനുളള സാധനം എന്റെ വക്കീലിന് കിട്ടിക്കോളും”. അഭിരാം കൊലക്കേസിലെ ഒരു പ്രതി പോലീസിനോട് ചോദ്യം ചെയ്യലിനിടെ ഇങ്ങനെ പറഞ്ഞത്രേ… പാങ്ങപ്പാറ കൊലപാതകത്തിന്റെ അണിയറക്കഥകള്‍: കൗമാരത്തിന്റെ വഴിയെത്തിയ ക്രൂരതയും പോലീസിനെ വെല്ലുവിളിക്കുന്ന ആസൂത്രണവും
തിരുവനന്തപുരം: ഒരുകാലത്ത് സിനിമാക്കഥകളെപ്പോലും വെല്ലുന്ന തരത്തിലുള്ള ആസൂത്രണങ്ങളും കുറ്റകൃത്യങ്ങളുമാണ് നമ്മുടെ കൗമാരക്കാരുടെ ഇടയില്‍ നിന്നും പുറത്തുവരുന്നത്. പതിനേഴുകാരനായ അഭിരാമിന്റെ കൊലപാതകവും അത്തരത്തിലുള്ള ഞെട്ടിക്കുന്ന ചില രഹസ്യങ്ങളിലേക്കാണ് വെളിച്ചം വീശുന്നത്. കേവലം ഒരു ചെറിയ പ്രകോപനത്തില്‍ തുടങ്ങി, പിന്നീട് തണുത്ത രക്തത്തോടെ നടപ്പാക്കിയ ആസൂത്രിത കൊലപാതകത്തിന്റെ ചുരുളഴിക്കാന്‍ പാടുപെടുകയാണ് പോലീസും.
‘സര്‍, എന്റെ ഫോണ്‍ പരിശോധിച്ചാല്‍ എന്നെ ഊരിയെടുക്കാനുള്ള സാധനം എന്റെ വക്കീലിന് കിട്ടിക്കോളും’- ചോദ്യം ചെയ്യലിനിടെ പോലീസിനു മുന്നിലിരുന്ന് തികഞ്ഞ ആത്മവിശ്വാസത്തോടെ പ്രതികളിലൊരാള്‍ പറഞ്ഞ ഈ വാക്കുകള്‍ മതി, ഈ കുട്ടിക്കുറ്റവാളികളുടെ മനസ്സ് എത്രത്തോളം അപകടകരമാണെന്ന് തിരിച്ചറിയാന്‍.
തുടക്കം ഒരു നിസ്സാര പ്രകോപനത്തില്‍
പതിനേഴുകാരനെ മറ്റൊരു പതിനേഴുകാരന്‍ കൊലപ്പെടുത്തി എന്ന വാര്‍ത്തയായിരുന്നു ആദ്യം പുറത്തുവന്നത്. എന്നാല്‍, പോലീസിന്റെ തുടര്‍ അന്വേഷണത്തിലാണ് ഇതിനു പിന്നിലെ യഥാര്‍ത്ഥ മാസ്റ്റര്‍മൈന്‍ഡ് മറ്റൊരാളാണെന്ന് വ്യക്തമായത്.
കേസില്‍ ഒന്നാം പ്രതിയായ കൗമാരക്കാരന്റെ മുന്‍ കാമുകി മറ്റൊരു സുഹൃത്തിനെ കണ്ടെത്തിയതാണ് പ്രശ്‌നങ്ങളുടെ തുടക്കം. ഈ സുഹൃത്തും പെണ്‍കുട്ടിയും ഒന്നിച്ചുള്ള ചിത്രങ്ങള്‍ ഇന്‍സ്റ്റഗ്രാമിലും വാട്സാപ്പിലും വന്നത് ഒന്നാം പ്രതിയെ വല്ലാതെ പ്രകോപിപ്പിച്ചു. തന്റെ മുന്‍ കാമുകിയുടെ പുതിയ സുഹൃത്തിനെ പാഠം പഠിപ്പിക്കാന്‍ തീരുമാനിച്ച ഇയാള്‍, കൂട്ടുകാരനായ ഉമറിന്റെ സഹായം തേടി. ശ്രീകാര്യം, പാങ്ങപ്പാറ മേഖലകളില്‍ വലിയ സൗഹൃദവലയമുള്ള ഉമറാണ് ഈ കൊലപാതകത്തിന്റെ മുഴുവന്‍ തിരക്കഥയും രചിച്ചതെന്നാണ് പോലീസ് കണ്ടെത്തിയിരിക്കുന്നത്.
കരുതിക്കൂട്ടിയുള്ള കെണി
ആദ്യം ലക്ഷ്യമിട്ട കൗമാരക്കാരനെ പാങ്ങപ്പാറയിലേക്ക് വരുത്താന്‍ വേണ്ടിയാണ് അഭിരാമിനെ ഇവര്‍ കരുവാക്കിയത്. ‘ആനന്ദ’ എന്ന വ്യാജ പേരില്‍ ചാറ്റ് ചെയ്ത് അഭിരാമിന്റെ വിശ്വാസം നേടിയെടുത്തു. തുടര്‍ന്ന് ആനന്ദയെ കാണാനായി പാങ്ങപ്പാറയിലെത്തിയ അഭിരാമിന് അരികിലേക്ക് യാദൃച്ഛികമായി എന്ന വ്യാജേന ഒന്നാം പ്രതിയെത്തുകയായിരുന്നു.
തുടര്‍ന്ന്, നിങ്ങളുടെ ചില കോമണ്‍ സുഹൃത്തുക്കള്‍ അടുത്തുതന്നെയുണ്ടെന്ന് വിശ്വസിപ്പിച്ച് അഭിരാമിനെ ആളൊഴിഞ്ഞ കാട്ടുപ്രദേശത്തേക്ക് കൂട്ടിക്കൊണ്ടുപോയി. ക്യാമറകളുടെ ശ്രദ്ധയില്‍ പെടാത്ത മറ്റൊരു ചതുപ്പുനിലത്തിലൂടെയാണ് ഉമര്‍ അവിടെയെത്തി നിലയുറപ്പിച്ചത്. തങ്ങളുടെ സാന്നിധ്യം പുറത്തറിയാതിരിക്കാന്‍ അത്രയേറെ കരുതലോടെയായിരുന്നു ഇവര്‍ നീങ്ങിയത്.
അവിടെയെത്തിയ അഭിരാമിനോട് തങ്ങള്‍ ലക്ഷ്യമിട്ട ആളെ വിളിച്ചുവരുത്താന്‍ ആവശ്യപ്പെട്ടെങ്കിലും അഭിരാം അതിന് തയ്യാറായില്ല. ചതി മനസ്സിലാക്കി രക്ഷപ്പെടാന്‍ ശ്രമിച്ച അഭിരാമിനെ ഇരുവരും ചേര്‍ന്ന് ബെല്‍റ്റ് ഉപയോഗിച്ച് കഴുത്തുഞെരിച്ച് കൊലപ്പെടുത്തുകയായിരുന്നു. പിന്നീട് മൃതദേഹം വാഴക്കൂട്ടത്തിനിടയില്‍ ഒളിപ്പിച്ചശേഷം ഇവര്‍ അവിടെനിന്നും കടന്നുകളഞ്ഞു.
പോലീസിനെ വട്ടം കറക്കുന്ന ചോദ്യങ്ങളും തെളിവുകളും
തിരോധാന പരാതിയെ തുടര്‍ന്ന് തിരുവനന്തപുരം സിറ്റി പോലീസ് കമ്മീഷണറുടെ ഡാന്‍സാഫും കഴക്കൂട്ടം എ.സി.പിയുടെ പ്രത്യേക സ്‌ക്വാഡും നടത്തിയ അന്വേഷണത്തിലാണ് പ്രതികള്‍ പിടിയിലായത്. ചോദ്യം ചെയ്യലിന്റെ തുടക്കത്തില്‍, താന്‍ ഒറ്റയ്ക്കാണ് കൊലപാതകം നടത്തിയത് എന്നായിരുന്നു ഒന്നാം പ്രതി പറഞ്ഞത്. പ്രായപൂര്‍ത്തിയാകാത്ത തനിക്ക് വലിയ ശിക്ഷ ലഭിക്കില്ലെന്നും, ഉമര്‍ പുറത്തുനിന്നു കാര്യങ്ങള്‍ നോക്കിക്കോളുമെന്നുമുള്ള വ്യാജ ആത്മവിശ്വാസമായിരുന്നു ഇതിനുപിന്നില്‍.
എന്നാല്‍ ശാസ്ത്രീയ തെളിവുകളുടെ അടിസ്ഥാനത്തില്‍ പോലീസ് ഉമറിനെ ചോദ്യം ചെയ്തതോടെയാണ് സത്യങ്ങള്‍ പുറത്തുവന്നത്.
ഇപ്പോഴും പ്രതികളുടെ ഫോണുകളും വസ്ത്രങ്ങളും കണ്ടെത്തുക എന്നതാണ് അന്വേഷണ സംഘത്തിന് മുന്നിലുള്ള പ്രധാന വെല്ലുവിളി. ഈ തെളിവുകളെല്ലാം തോട്ടില്‍ ഒഴുക്കി എന്നാണ് പ്രതികള്‍ മൊഴി നല്‍കിയിട്ടുള്ളതെങ്കിലും, സ്‌കൂബാ ടീം അടക്കം പരിശോധിച്ചിട്ടും ഇതുവരെ കണ്ടെത്താനായിട്ടില്ല. ചോദ്യം ചെയ്യലില്‍ ഒട്ടും കുസലില്ലാതെ പ്രതികള്‍ പെരുമാറുന്നതും, നിയമപരമായ പഴുതുകള്‍ കണ്ടെത്താന്‍ വക്കീലന്മാരുടെ ഉപദേശം തേടിയിട്ടുണ്ടാകാം എന്ന സംശയവും പോലീസിനെ ജാഗരൂകരാക്കുന്നുണ്ട്.
കൗമാരങ്ങളില്‍ ആവര്‍ത്തിക്കപ്പെടേണ്ട സന്ദേശം
ഒരു കുടുംബത്തിന്റെ സമാധാനവും പ്രതീക്ഷയുമാണ് ക്രൂരമായ ആസൂത്രണത്തിലൂടെ പൊലിഞ്ഞുപോയത്. പ്രായം കുറവായതുകൊണ്ട് എന്തുമാവാം എന്ന തെറ്റായ ധാരണ ഇനിയൊരു കൗമാരക്കാരനിലും ഉണ്ടാകരുത്. തലസ്ഥാനത്തിന്റെ മണ്ണില്‍ ഇത്തരം ഗുണ്ടാഗ്യാങ് പാരമ്പര്യങ്ങള്‍ക്ക് അറുതി വരുത്താനും, കൊലപാതകത്തില്‍ പങ്കാളികളായ എല്ലാവര്‍ക്കും അര്‍ഹമായ ശിക്ഷ ഉറപ്പാക്കാനും കര്‍ശനമായ നടപടികളാണ് പോലീസിന്റെ ഭാഗത്തുനിന്നും ഉണ്ടാകേണ്ടത്.
അഭിരാം വധക്കേസ്: പോലീസിനെ തെറ്റിദ്ധരിപ്പിക്കാന്‍ ആസൂത്രിത നാടകം; ഉമറിന്റെ പെണ്‍സുഹൃത്ത് ഐശ്വര്യ അറസ്റ്റില്‍
തിരുവനന്തപുരം: പാങ്ങപ്പാറയില്‍ പതിനേഴുകാരനായ അഭിരാമിനെ കൊലപ്പെടുത്തിയ കേസില്‍ വൻ വഴിത്തിരിവ്. കേസില്‍ പ്രതികളെ സംരക്ഷിക്കാനും തെളിവുകള്‍ നശിപ്പിക്കാനും കൂട്ടുനിന്ന മുഖ്യസൂത്രധാരൻ ഉമറിന്റെ പെണ്‍സുഹൃത്ത് ഐശ്വര്യയെ പോലീസ് അറസ്റ്റ് ചെയ്തു. മണിക്കൂറുകള്‍ നീണ്ട ചോദ്യം ചെയ്യലിനൊടുവിലാണ് ഐശ്വര്യയുടെ അറസ്റ്റ് രേഖപ്പെടുത്തിയത്. കൊലപാതകത്തിന് പിന്നില്‍ വ്യക്തമായ ആസൂത്രണവും ഗൂഢാലോചനയും നടന്നിട്ടുണ്ടെന്ന പോലീസിന്റെ സംശയങ്ങള്‍ക്ക് ബലമേകുന്നതാണ് പുതിയ കണ്ടെത്തലുകൾ.
അന്വേഷണത്തെ വഴിതിരിച്ചുവിടാന്‍ കള്ളക്കളി
രണ്ടാം പ്രതിയായ ഉമറിന് കൃത്യം നടക്കുമ്പോള്‍ കൃത്യമായ ആലബി (Alibi – അറ്റാക്ക് നടന്ന സമയത്ത് സംഭവസ്ഥലത്തില്ലായിരുന്നു എന്ന തെളിവ്) ഉണ്ടാക്കിയെടുക്കാനാണ് ഐശ്വര്യയെ ഉപയോഗിച്ചതെന്നാണ് പോലീസ് കണ്ടെത്തല്‍. കൊലപാതകം നടക്കുന്ന സമയം മുഴുവന്‍ ഉമര്‍ വീട്ടില്‍ത്തന്നെ ഉണ്ടായിരുന്നു എന്ന് വരുത്തിത്തീര്‍ത്ത് അന്വേഷണ സംഘത്തിന്റെ കണ്ണ് വെട്ടിക്കാനായിരുന്നു ഇവരുടെ നീക്കം.
ഇതിനായി കൊലപാതകം നടന്ന സമയം ഉമറിനെ ഐശ്വര്യ ഫോണില്‍ വിളിക്കുകയും, കൃത്യം നടന്നു കഴിയുന്നത് വരെ ഈ ഫോണ്‍ കോള്‍ തുടരുകയും ചെയ്തു. ഉമറിന്റെ ഫോണ്‍ ലൊക്കേഷൻ വീട്ടിലാണെന്ന് വരുത്താനും, പോലീസ് ചോദിച്ചാല്‍ ഉമര്‍ തന്റെ കൂടെ സംസാരിച്ചുകൊണ്ടിരിക്കുകയായിരുന്നു എന്ന് മൊഴി നല്‍കാനുമായിരുന്നു ഈ നാടകം.
ക്രിമിനല്‍ പശ്ചാത്തലമുള്ള പ്രതികള്‍
കേസിലെ പ്രധാന ആസൂത്രകനായ ഉമർ നേരത്തെ ‘കാപ്പ’ (KAAPA) ചുമത്തപ്പെട്ട് ശിക്ഷ അനുഭവിച്ചിട്ടുള്ള പ്രൊഫഷണല്‍ ക്രിമിനലാണ്. ഒന്നാം പ്രതിയായ പതിനേഴുകാരനാകട്ടെ നേരത്തെ തന്നെ മോഷണക്കേസുകളിൽ പ്രതിയുമാണ്.
നിയമത്തിന്റെ പഴുതുകളെക്കുറിച്ചും പോലീസിന്റെ അന്വേഷണ രീതികളെക്കുറിച്ചും വ്യക്തമായ ധാരണയുള്ള ഉമർ, പഴുതടച്ച ആസൂത്രണത്തിലൂടെ കേസില്‍ നിന്നും ഊരിപ്പോകാനാണ് ശ്രമിച്ചത്. പെണ്‍സുഹൃത്തിനെക്കൂടി ഗൂഢാലോചനയില്‍ പങ്കാളിയാക്കിക്കൊണ്ട് ഉമർ മെനഞ്ഞ തിരക്കഥയാണ് ശാസ്ത്രീയ അന്വേഷണത്തിലൂടെ പോലീസ് പൊളിച്ചടുക്കിയത്. തെളിവ് നശിപ്പിക്കല്‍, ഗൂഢാലോചന തുടങ്ങിയ ഗുരുതരമായ കുറ്റങ്ങളാണ് ഐശ്വര്യക്കെതിരെ ചുമത്തിയിട്ടുള്ളത്.